រាជធានីភ្នំពេញ ៖ បុរសម្នាក់ស្រវឹងស្រាខ្លាំង បានបើករថយន្តស៊េរីទំនើបម៉ាក Ford Everest យ៉ាងលឿនក៍បានរេចង្កូតទៅបុកទម្លុះ ចូលទៅក្នុងផ្ទះពលរដ្ឋរងការខូចខាតទ្វារ និងសម្ភារៈនៅក្នុងនោះអស់មួយចំនួន។
ហេតុការណ៍ខាងលើបង្កឲ្យមានការភ្ញាក់ផ្អើលកាលពីវេលាម៉ោង៨និង៣០នាទីយប់ថ្ងៃទី៣ ខែធ្នូឆ្នាំ២០២៣
ស្ថិតនៅតាមបណ្តោយផ្លូវ២០៥ ក្នុងសង្កាត់ទួលស្វាយព្រៃទី២ ខណ្ឌបឹងកេងកង រាជធានីភ្នំពេញ។
យោងតាមការបញ្ជាក់ពីប្រជាពលរដ្ឋដែលបានឃើញហេតុ ការណ៍ខាងលើ ប្រាប់ឲ្យដឹងថា នៅមុនកើតហេតុគេឃើញរថយន្តស៊េរីទំនើបម៉ាក Ford Evrest ពណ៌ខ្មៅមួយគ្រឿងពាក់ផ្លាកលេខ ភ្នំពេញ 2BT- 8168 បើកបរដោយបុរសម្នាក់តាមបណ្តោយផ្លូវ២០៥ ក្នុងទិសដៅពីលិចមកកើតក្នុងល្បឿនយ៉ាងលឿន ពេលមកដល់ចំណុចកើតហេតុស្រាប់តែបួងចង្កូតបុកទម្លុះចូលផ្ទះពលរដ្ឋ បណ្តាលឲ្យខូចខាតទ្វារមួយចំនួន និងបាក់ជញ្ជាំងនៅខាងមុខជាច្រើនផ្ទាំង ហើយរថយន្តបង្កខ្ទេចមួយកំណាត់មុខស្ទើរទាំងស្រុង សំណាងល្អមិនគ្រោះថ្នាក់ទៅលើមនុស្ស ចំណែកអ្នកបើកបានរត់គេចពីកន្លែងកើតហេតុទាំងស្ថានភាពស្រវឹងបាត់ស្រមោល។
បន្ទាប់ពីកើតហេតុខាងលើសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលសង្កាត់ទួលស្វាយព្រៃទី២ បានចុះទៅដល់ពិនិត្យជុំវិញទីតាំងកើតហេតុរួចក៏បានទំនាក់ទំនង ទៅមន្ត្រីជំនាញចរាចរណ៍ក្រុងបន្តដើម្បីឲ្យចុះមកវាស់វែង និងធ្វើកំណត់ហេតុស្ទូចយករថយន្តបង្កខាងលើ ទៅរក្សាទុកនៅខាងការិយាល័យចរាចរណ៍ជំនាញផ្លូវគោក នៃស្នងការដ្ឋាននគរបាលរាជធានីភ្នំពេញ ដោយរង់ចាំឲ្យភាគីម្ចាស់រថយន្តបង្ក ចូលខ្លួនធ្វើការដោះស្រាយជាមួយខាងម្ចាស់ផ្ទះ៕
