ភ្នំពេញ ៖ កាលពី ថ្ងៃទី១៩ ខែមេសា ឆ្នាំ២០២២ នៅតាមបណ្ដោយផ្លូវលេខ១០៤ កែងផ្លូវក្រវាត់ក្រុង៣ ស្ថិតក្នុងភូមិគងនយ សង្កាត់គងនយ ខណ្ឌដង្កោ រាជធានីភ្នំពេញ ។
សពជនរងគ្រោះមានឈ្មោះ ធី ឈុនណី ភេទប្រុស អាយុ២៤ឆ្នាំ មុខរបរជាមន្ត្រីកងរាជអាវុធហត្ថ មានទីកន្លែងកំណើតនៅភូមិល្វា ឃុំជយំ ស្រុកកំពង់ស្វាយ ខេត្តកំពង់ធំ បានជិះម៉ូតូម៉ាកហុងដាស្គូពី ពណ៌ក្រហម ពាក់ស្លាកលេខភ្នំពេញ 1FR-8654 ។ ចំណែកតៃកុងរថយន្តបង្កហេតុមានឈ្មោះ ហាក់ វណ្ណៈ ភេទប្រុស អាយុ៤១ឆ្នាំ ទីកន្លែងកំណើតនៅឃុំសំពៅពូន ស្រុកកោះធំ ខេត្តកណ្ដាល បើករថយន្តម៉ាកហុីយ៉ាន់ដាយ ដឹកដីធុនធំ ពណ៌ក្រហម ពាក់ស្លាកលេខភ្នំពេញ 3F-9657 ។
មុនពេលកើតហេតុ គេឃើញបុរសម្នាក់ជាជនរងគ្រោះបានជិះម៉ូតូតាមបណ្ដោយផ្លូវលេខ១០៤ពីលិចទៅកើតក្នុងល្បឿនលឿនល្មម ស្របពេលនោះក៏មានរថយន្តហុីយ៉ាន់ដាយដឹកដីធុនធំ ដែលបើកបរដោយបុរសម្នាក់មកពីក្រោយក្នុងល្បឿនលឿនបានជ្រុលទីបុកម៉ូតូពីក្រោយ និងបានកិនម៉ូតូអូសជាច្រើនម៉ែត្រខ្ទេចគ្មានសល់ ព្រមទាំងកិនជនរងគ្រោះបែកក្បាលធ្លាយខួរស្លាប់នៅនិងកន្លែងយ៉ាងអាណោចអាធ័ម ។ ភ្លាមៗនោះដែរតៃកុងរថយន្តបង្កគ្រោះថ្នាក់មិនព្រមឈប់ទទួលខុសត្រូវនៅកន្លែងកើតហេតុនោះទេ គឺព្យាយាមបើករត់ជាច្រើនរយម៉ែត្រ តែត្រូវប្រជាពលរដ្ឋដេញតាមឃាត់បានទាំងរថយន្តនិងតៃកុងប្រគល់ឱ្យសមត្ថកិច្ច ។
សមត្ថកិច្ចជំនាញចរាចរណ៍ខណ្ឌដង្កោបានចុះមកធ្វើការវាស់វែងយកម៉ូតូនិងរថយន្ត ព្រមទាំងតៃកុងប្រគល់ឱ្យខាងការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយតាមច្បាប់ ។ ដោយឡែកសពជនរងគ្រោះត្រូវបានសមត្ថកិច្ចធ្វើកំណត់ហេតុប្រគល់ឱ្យសាច់ញាតិក្រុមគ្រួសារដឹកយកទៅធ្វើបុណ្យតាមប្រពៃណី៕
